I had ae nicht, and only ane,

On flo'ry Ythanside;

An' kith or kindred I hae nane

That dwall by Ythanside;

Yet midnicht dream and morning vow,

At hame they winna bide,

But pu' and pu' my willing heart

Awa' to Ythanside.

What gars its restless wand'ring wish

Seek aye to Ythanside,

An' hover round yon fairy bush

That spreads o'er Ythanside?

I think I see its pawkie boughs,

Where lovers weel might hide;

An', oh, what heart could safely sit

Yon nicht on Ythanside.

Could I return and own the scaith

I thole frae Ythanside,

Would her mild eye bend lythe on me

Ance mair on Ythanside?

Or would she crush my lowly love

Beneath a brow o' pride?

I daurna claim and maurna blame

Her heart on Ythanside.

I 'll rue yon high and heathy seat

That hangs o'er Ythanside;

I 'll rue the mill where bumies meet;

I 'll rue ye, Ythanside.

And you, ye moon, wi' luckless licht,

Pour'd a' your gowden tide

O'er sic a brow! sic e'en yon nicht!

Oh, weary Ythanside.

This is the other one in a somewhat different vein, but with equal magic in its melody and tender sweetness of expression:—