CXLII
LOYALTY It’s hame, an’ it’s hame, hame fain wad I be,
O it’s hame, hame, hame, to my ain countrie!
When the flower is i’ the bud and the leaf is on the tree,
The lark shall sing me hame in my ain countrie;
For it’s hame, an’ it’s hame, hame fain wad I be,
O it’s hame, hame, hame, to my ain countrie!
The green leaf o’ loyaltie’s begun for to fa’,
The bonnie white rose it is witherin’ an’ a’,
But I’ll water’t wi’ the blude of usurpin’ tyrannie,
An’ green it will grow in my ain countrie.
For it’s hame, an’ it’s hame, hame fain wad I be,
O it’s hame, hame, hame, to my ain countrie!
The great are now gane, a’ wha ventured to save;
The new grass is springin’ on the tap o’ their grave:
But the sun thro’ the mirk blinks blythe in my e’e,
‘I’ll shine on ye yet in yere ain countrie.’
For it’s hame, an’ it’s hame, hame fain wad I be,
O it’s hame, hame, hame, to my ain countrie!
|
|
