Why does your brand sae drap wi' blood

Edward, Edward?

Why does your brand sae drap wi' blood

And why sae sad gang ye oh?

"Oh I hae killed my hawk sae good,

Mither, mither:

Oh I hae killed my hawk so good,

And I had no mair but he oh."

Your hawk's blood was never sae red,

Edward, Edward;

Your hawk's blood was never sae red,

My dear son I tell thee oh.

"Oh I hae killed my red-roan steed,

Mither, mither:

Oh I hae killed my red roan steed

That erst was sae fair and free oh."

Your steed was auld, and ye hae got mair,

Edward, Edward;

Your steed was auld, and ye hae got mair,

Some other dule ye dree oh.

"Oh I hae killed my father dear,

Mither, mither:

Oh I hae killed my father dear,

Alas! and wae is me oh!"

And whatten penance will ye dree for that,

Edward, Edward?

And whatten penance will ye dree for that?

My dear son, now tell me oh.

"I'll set my feet in yonder boat,

Mither, mither:

I'll set my feet in yonder boat,

And I'll fare over the sea oh."

And what will ye do wi' your towers and your ha',

Edward, Edward?

And what will ye do wi' your towers and your ha',

That were sae fair to see oh?

"I'll let them stand till they down fa',

Mither, mither:

I'll let them stand till they down fa',

For here never mair maun I be oh."

And what will ye leave to your bairns and your wife,

Edward, Edward?

And what will ye leave to your bairns and your wife,

When ye gang over the sea oh?

"The world's room, let them beg through life,

Mither, mither:

The world's room, let them beg through life,

For them never mair will I see oh."

And what will ye leave to your ain mither dear,

Edward, Edward?

And what will ye leave to your ain mither dear,

My dear son, now tell me oh.

"The curse of hell frae me shall ye bear,

Mither, mither:

The curse of hell frae me shall ye bear,

Sic counsels ye gave to me oh."