From THE GENTLE SHEPHERD

PATIE AND ROGER

Beneath the south side of a craigy bield,
Where crystal springs the halesome waters yield,
Twa youthfu' shepherds on the gowans lay,
Tenting their flocks ae bonny morn of May.
Poor Roger granes, till hollow echoes ring;
But blither Patie likes to laugh and sing.

Patie. My Peggy is a young thing,
Just entered in her teens,
Fair as the day, and sweet as May,
Fair as the day, and always gay;
My Peggy is a young thing,
And I'm not very auld,
Yet well I like to meet her at
The wauking of the fauld.

My Peggy speaks sae sweetly
Whene'er we meet alane,
I wish nae mair to lay my care,
I wish nae mair of a' that's rare:
My Peggy speaks sae sweetly,
To a' the lave I'm cauld,
But she gars a' my spirits glow
At wauking of the fauld.

My Peggy smiles sae kindly
Whene'er I whisper love,
That I look down on a' the town,
That I look down upon a crown;
My Peggy smiles sae kindly,
It makes me blythe and bauld,
And naething gi'es me sic delight
At wauking of the fauld.

My Peggy sings sae saftly
When on my pipe I play,
By a' the rest it is confest,
By a' the rest, that she sings best;
My Peggy sings sae saftly,
And in her sangs are tauld
With innocence the wale of sense,
At wauking of the fauld.

This sunny morning, Roger, chears my blood,
And puts all Nature in a jovial mood.
How hartsome is't to see the rising plants,
To hear the birds chirm o'er their pleasing rants!

How halesom 'tis to snuff the cauler air,
And all the sweets it bears, when void of care!
What ails thee, Roger, then? what gars thee grane?
Tell me the cause of thy ill-seasoned pain.

Roger. I'm born, O Patie, to a thrawart fate;
I'm born to strive with hardships sad and great!
Tempests may cease to jaw the rowan flood,
Corbies and tods to grein for lambkins' blood;
But I, oppressed with never-ending grief,
Maun ay despair of lighting on relief.

* * * * *

You have sae saft a voice and slid a tongue,
You are the darling of baith auld and young:
If I but ettle at a sang or speak,
They dit their lugs, syne up their leglens cleek,
And jeer me hameward frae the loan or bught,
While I'm confused with mony a vexing thought;
Yet I am tall, and as well built as thee,
Nor mair unlikely to a lass's eye;
For ilka sheep ye have I'll number ten,
And should, as ane may think, come farer ben.

* * * * *

Patie. Daft gowk! leave aff that silly whinging way!
Seem careless: there's my hand ye'll win the day.
Hear how I served my lass I love as weel
As ye do Jenny and with heart as leel.
Last morning I was gay and early out;
Upon a dyke I leaned, glowring about.
I saw my Meg come linkan o'er the lea;
I saw my Meg, but Peggy saw na me,
For yet the sun was wading thro' the mist,
And she was close upon me e'er she wist:
Her coats were kiltit, and did sweetly shaw
Her straight bare legs, that whiter were than snaw.
Her cockernony snooded up fou sleek,
Her haffet-locks hang waving on her cheek;
Her cheeks sae ruddy, and her een sae clear;
And, oh, her mouth's like ony hinny pear;
Neat, neat she was in bustine waistcoat clean,
As she came skiffing o'er the dewy green.
Blythesome I cried, 'My bonnie Meg, come here!
I ferly wherefore ye're sae soon asteer,

But I can guess ye're gawn to gather dew.'
She scoured awa, and said, 'What's that to you?'
'Then fare ye weel, Meg Dorts, and e'en's ye like,'
I careless cried, and lap in o'er the dyke.
I trow when, that she saw, within a crack
She came with a right thieveless errand back:
Misca'd me first; then bade me hound my dog,
To wear up three waff ewes strayed on the bog.
I leugh, an sae did she: then with great haste
I clasped my arms about her neck and waist,
About her yielding waist, and took a fourth
Of sweetest kisses frae her glowing mouth;
While hard and fast I held her in my grips,
My very saul came louping to my lips;
Sair, sair she flet wi' me 'tween ilka smack,
But weel I kenned she meant nae as she spak.
Dear Roger, when your jo puts on her gloom,
Do ye sae too and never fash your thumb:
Seem to forsake her, soon she'll change her mood;
Gae woo anither, and she'll gang clean wood.

Dear Roger, if your Jenny geck,
And answer kindness with a slight,
Seem unconcerned at her neglect;
For women in a man delight,
But them despise who're soon defeat
And with a simple face give way
To a repulse: then he not blate;
Push bauldly on, and win the day.

When maidens, innocently young,
Say aften what they never mean,
Ne'er mind their pretty lying tongue,
But tent the language of their een:
If these agree, and she persist
To answer all your love with hate,
Seek elsewhere to be better blest,
And let her sigh when'tis too late.

Roger. Kind Patie, now fair fa' your honest heart!
Ye're ay sae cadgy, and have sie an art

To hearten ane; for now, as clean's a leek,
Ye've cherished me since ye began to speak.
Sae, for your pains, I'll mak ye a propine
(My mother, rest her saul! she made it fine)—
A tartan plaid, spun of good hawslock woo,
Scarlet and green the sets, the borders blue,
With spraings like gowd and siller crossed with black;
I never had it yet upon my back:
Weel are ye wordy o' 't, what have sae kind
Sed up my reveled doubts and cleared my mind.